بانکي پورونو ته د لاسرسۍ لپاره د اسانتیا د رامنځ ته کولو په موخه درېمه بانکي او مالي غونډه جوړه شوه

د خپرېدو نېټه: May 15, 2017

کابل، ۱۳۹۶ کال د غويي ۲۴–  د بانکي او مالي ډلې د تیرو غونډو په دوام کې درېمه غونډه د افغانستان بانک د دویم مرستیال ښاغلي محمد قسیم رحیمي په مشرۍ جوړه شوه.

د افغانستان بانک دویم مرستیال ښاغلي محمد قسیم رحیمي وویل چې بانکي او مالي خدمتونو په تېره بیا کوچنیو پورونو ته لاسرسی د هر وګړي حق دی او د هېوادوالو لپاره په ټول هېواد کې د کوچنیو پورونو زمینه برابره شي.

ښاغلي رحیمي زیاته کړه چې د پور د اجرا لپاره د اسانتیا د رامنځ ته کولو په موخه ځیني ستونزمنې څیړنې تر کار لاندې دي څو ټول هغه شرکتونه او خلک چې په کوچنیو او لویو تشبثاتو کې پانګونه کوي په ډاډمنتیا سره له سوداګریزو بانکونو څخه پور ترلاسه کړي او د هېواد د اقتصاد د ودې او راغوړېدنې لپاره ترې زیاته ګټه پورته کړي.

په دې غونډه کې مالي خدمتونو ته د خلکو د لاسرسۍ عمومي آمر ښاغلي میر احمد شکیب او د عامه اعتباراتو د ثبت دفتر آمر ښاغلي ډاکټر سادات په همدې اړه ګډون کوونکو ته پرزنټیشن وړاندې کړ.

د یادولو وړ ده چې په دې غونډه کې د افغانستان د اسلامي جمهوري ریاست او د اجرائیه ریاست استازو، د افغانستان د صنفي ټولنې استازو، د سوداګرۍ او صنایعو اطاق استازو، د افغانستان د بانکونو ټولنې رئیس، د ټولو پانګه اچوونکو ټولنې مرستیال، د مالي شخړو د حل کمیسیون رئیس او د افغانستان بانک د بیلابیلو شعبو آمرینو ګډون کړی ؤ.