د صرافانو او پولي خدمتونو د وړاندې کوونکو د کړنو د تنظیم په مقرره تعدیلات

کابل، ۱۳۹۶ د چنګاښ ۲۸- د افغانستان بانک د صرافانو او پولي خدمتونو د وړاندې کوونکو د عامه پوهاوۍ په اړه په ښوونیزه پروګرام کې د صرافانو او مالي خدمتونو د وړاندې کوونکو وړاندیزونه واوریدل شول.

د افغانستان بانک استازو د برنامې په ترڅ کې وویل چې د پولي خدمتونو او صرافانو د کړنو د تنظیم او قانوني کیدو په مقرره کې تعدیلات، د جواز د اعتبار د نیټې غځول، د مالي شرکتونو جوړول، او د صرافانو د ثبتولو پروسه رانغاړي.

د افغانستان بانک هڅه کوي چې ټولې مالي معاملې باید له خوندیتوب څخه برخمنې وي او هیڅ راز معامله هم د تورو پیسو د سپینولو لامل ونه ګرځي.

په دې برنامه کې د صرافانو د ټولنې استازو وویل چې د افغانستان بانک په یاده مقرره کې تعدیلات د مالي نظام د پیاوړتیا او خوندیتوب په موخه راغلي دي، خو د ګرځنده صرافانو په اړه باید هم پریکړه وشي او ټولې کړنې یې د قانون په رڼا کې ترسره شي، ځکه ځینې مالې معاملې د دوی له خوا ترسره کیږي.

د عامه پوهاوۍ برنامه چې د افغانستان بانک د څارنې لوی آمريت لخوا جوړ شوی وه، دوه ورځې یې دوام درلود او د دویمې ورځې په پای کې یې له کډون کونکو سره ژمنه وکړه چې ډیر ژر به د دې برنامې تصدیق لیکونه ترلاسه کړئ.

د افغانستان بانک تل هڅه کړې ده چې د مالي نظام د پرمختګ او ښه مدیریت په موخه له ټولو مالي معاملو څخه څارنه وکړي او پرې نږدي چې پیسو وینځوونکي لدې فرصت څخه ګټه پورته کړي او خپلې تورې پیسې سپینې کړي.