د افغانستان بانک او سویلي آسیا هېوادونو د مرکزي بانکونو ترمنځ د همغږۍ غونډه ترسره شوه

د خپرېدو نېټه: May 16, 2018

 

د افغانستان بانک له خوا د سویلي آسیا هېوادونو د مرکزي بانکونو د همغږۍ د اوه ویشتمې(27) غونډې کوربتوب د روان زیږدیز  کال د مې د میاشتې په 12 نېټه د متحده عربي اماراتو په دوبۍ ښار کې په بریالیتوب پای ته ورسیده .

د غونډې په ترڅ کې د افغانستان بانک سرپرست او لومړي مرستیال ښاغلي واحدالله نوشیر له ټولو ګډون والو د راتګ مننه وکړه او زیاته کړه چې د سویلي آسیا هېوادونه ډیر شتمن دي،د نړۍ په اقتصادي پرمختګ کې مهم رول لري ،د نړۍ اقتصاد ته یې ډير بشري ځواک وړاندې کړی دی.

ښاغلي نوشیر دغه راز وویل چې د سویلي آسیا هېوادونه له اقتصادي پلوه له یو بل سره نږدې، خو په سیاسي لحاظ له یو بل سره واټن لري  او  هیله یې څرګنده کړه چې باید په سیاسي او اقتصادي لحاظ  سره نږدې شي. په غونډه کې د یادو هېوادونو ترمنځ د مالي وړتیا لوړونې، مالي شمولیت، د سوداګریز بانکونو څار، د مالي راکړو او ورکړو آسانه کول، اقتصادي څیړنې، راتلونکې غونډه چې د جون په میاشت د نیپال هېواد کې د مرکزي بانکونو د رئیسانو ترمنځ ترسره کېږي په اجنډا او یوشمېر نورو مهمو موضوعاتو بحث ترسره شو.

د ګډونوالو هېوادونو استازو د افغانستان بانک چارواکو څخه د مننې ترڅنګ یاده غونډه بریالۍ وګڼله او هېله یې څرګنده کړه چې په همدې شان راتلونکې بله غونډه دې په کابل کې ترسره شي.

د یادونې وړ ده چې په دې غونډه کې د افغانستان بانک سرپرست او لومړي مرستیال ښاغلي واحدالله نوشیر، د افغانستان بانک د پولي سیاست د عمومي آمریت آمر او د سارک همغږي کوونکي ښاغلي سید اسحاق علوي، د افغانستان بانک د پولي سیاست د عمومي آمریت مرستیال او د سارک دویم همغږي کوونکي ښاغلي نایب خان جمال او سیمه ایز اقتصادي شننونکي او همغږي کوونکي ښاغلي محمد داود نیازي ګډون درلود.